விடுதலைப் புலிகளின் ஆயுதங்கள் முல்லைத்தீவில் தொடர்ச்சியாக மீட்கப்படுகின்றன

விடுதலைப் புலிகள் அமைப்பின் ஆயுதங்கள் தொடர்ச்சியாக முல்லைத்தீவு பிரதேசத்தில் இருந்து மீட்கப்பட்டுக் கொண்டிருப்பதாக விசேட அதிரடிப்படையினர் அறிவித்துள்ளனர்.
முல்லைத்தீவு பிரதேசத்தின் கட்டளை மற்றும் பாதுகாப்புப் பொறுப்பை விசேட அதிரடிப்படையினர் ஏற்றது தொடக்கம் அப்பகுதியில் நாளாந்தம் மேற்கொள்ளப்பட்டு வரும் சோதனைகளின் பொது பெருந்தொகையான ஆயுதங்கள் நாளுக்கு நாள் கண்டுபிடிக்கப்பட்டு வருவதாக அதிரடிப்படை வட்டாரங்கள் தெரிவிக்கின்றன.

அதன் ஒரு கட்டமாக முல்லைத்தீவின் அடம்பன் பிரதேசத்தில் அண்மையில் மேற்கொள்ளப்பட்ட சோதனை நடவடிக்கையின் போது புதைக்கப்பட்டிருந்த நிலையில் விடுதலைப் புலிகளின் பெருந்தொகையான ஆயுதங்கள் கண்டுபிடிக்கப்பட்டுள்ளன.

அதிசக்தி வாய்ந்த தொலைத்தொடர்புக்கருவிகள்-03, டிஜிட்டல் அலைவரிசையிலான தகவல் தொலைத்தொடர்புக்கருவிகள், கைக்குண்டுகள் 16, பீரங்கிக் குண்டுகள் 16, அதிசக்தி வாய்ந்த கிளேமோ குண்டுகள் 05, என்பவற்றுடன் பெருந்தொகையான துப்பாக்கி ரவைகள் மற்றும் ஆயுதங்களுக்கான உதிரிப்பாகங்கள் என்பனவும் அடம்பனில் நடைபெற்ற சோதனை நடவடிக்கையின் போது கைப்பற்றப்பட்டுள்ளன.