ஓமந்தை தடுப்புக்காவல் முகாம் இன்று தொடக்கம் மூடப்படுகின்றது

ஓமந்தையில் இயங்கி வந்த இராணுவத்தினரின் தடுப்புக் காவல் முகாம் இன்று முதல் மூடப்படவுள்ளதாக அறிவிக்கப்படுகின்றது.
ஓமந்தை மத்திய மகா வித்தியாலயத்தில் பிரஸ்தாப தடுப்புக் காவல் முகாம் இயங்கி வந்த நிலையில், முகாம் மூடப்படுவதன் காரணமாக பாடசாலைக்கட்டிடம் மீண்டும் அதன் அதிபரிடம் உத்தியோகபூர்வமாக இன்று கையளிக்கப்படவுள்ளது.

கடந்த 2009 மே மாதம் தொடக்கம் சுமார் இரண்டு வருடங்கள் வரையில் ஓமந்தை மத்திய மகா வித்தியாலயத்தில் இராணுவத்தினரின் தடுப்புக்காவல் முகாம் இயங்கி வந்திருந்தது.

அங்கிருந்த தடுப்புக்காவல் முகாமில் தடுத்து வைக்கப்பட்டிருந்த முன்னாள் விடுதலைப் புலி உறுப்பினர்கள் அனைவரும் தற்போதைக்கு சமூகமயப்படுத்தப்பட்டுள்ளதால், பிரஸ்தாப தடுப்பு முகாம் மூடப்பட்டுள்ளதாக வவுனியா அரச அதிபர் திருமதி சார்ள்ஸ் அறிவிக்கின்றார்.

ஓமந்தை மத்திய மகா வித்தியாலயத்தின் கல்வி நடவடிக்கைகள் மிக விரைவில் ஆரம்பிக்கப்படும் என்றும் அவர் மேலும் அறிவித்துள்ளார்.