விக்கி லீக்ஸ் தளம் இலங்கை தொடர்பில் மற்றுமொரு பரபரப்பு தகவலை வெளியிட்டுள்ளது

அதிரடி பாதுகாப்பு தகவல்களை கசியவிட்டு வருகின்ற விக்கிலீக்ஸ் இணையத்தளம், தற்போது இலங்கை தொடர்பில் மற்றுமொரு பரபரப்பு தகவலை வெளியிட்டுள்ளது.
வட கொரியாவினால் இலங்கை அரசாங்கத்துக்கு ஆயுதங்கள் விநியோகிக்கப்பட்டதாக புதிய தகவல்கள் வெளியாகியுள்ளன.

அமெரிக்க திறைசேரியின் அதிகாரி ஸ்டுவார்ட் லெவேயினால், அமெரிக்க இராஜாங்க திணைக்களத்துக்கு அனுப்பி வைக்கப்பட்ட இரகசிய ஆவணம் ஒன்றில் இந்த விடயம் சுட்டிக்காட்டப்பட்டுள்ளது.

விக்கிலீக்ஸ் வழங்கிய இந்த ஆவணம் தொடர்பிலான தகவல்களை, அமெரிக்காவின் நியூயோர்க் டைம்ஸ் பத்திரிகை இன்று வெளியிட்டுள்ளது.

இந்த செய்தியின்படி, வடகொரியா இலங்கை அரசாங்கத்;துக்கு அதிக அளவிலான ரொக்கட் லோஞ்சர்களை வழங்கியுள்ளமை தெரியவந்துள்ளது.

அமெரிக்காவின் எதிர்ப்பையும் மீறி இலங்கை அரசாங்கம் அவற்றை கொள்வனவு செய்துள்ளதாக அதில் தெரிவிக்கப்பட்டுள்ளது.

இதேவேளை இந்த ஆயுத பரிமாற்றலுக்கான நிதி வழங்கல்களுக்காக, சீனாவின் வங்கிகள் பயன்படுத்தப்பட்டுள்ளதாக தெரிவிக்கப்பட்டுள்ளது.

முன்னதாக தமிழீழ விடுதலைப் புலிகளுக்கு வடகொரியா ஆயுதங்களை வழங்கியதாக குற்றம் சுமத்தப்பட்டிருந்தது.

எனினும் தற்போது அந்த ஆயுதங்கள் இலங்கை அரசாங்கத்துக்கே அனுப்பி வைக்கப்பட்டுள்ளமை, விக்கிலீக்ஸின் உதவியுடன் வெளிவந்துள்ளது.