அம்பாறையில் கப்பம் பெற்ற விடுதலைப் புலி உறுப்பினர் கைது

அம்பாறைப் பிரதேசத்தில் கப்பம் பெறுதல் மற்றும் பணமோசடி நடவடிக்கைகளில் ஈடுபட்டு வந்த விடுதலைப் புலிகளின் முன்னாள் உறுப்பினர் ஒருவர் பொலிசாரினால் கைது செய்யப்பட்டுள்ளார்.
திருக்கோயில் பிரதேசத்தின் நாவலடியைச் சோ்ந்த திருச்சந்திரன் சுரேந்திரன் (கரண்ட்) என்பவரே அவ்வாறு கப்பம் பெறல் மற்றும் பணமோசடிக் குற்றச்சாட்டுகளின் பேரில் கைது செய்யப்பட்டிருப்பவராவார்.

விடுதலைப் புலிகள் அமைப்பு இயங்கிய காலத்தில் அவர் அம்பாறைப் பிரதேசத்தின் புலனாய்வுப் பொறுப்பாளராக செயற்பட்டவர் என்பது பிரதேச வாசிகளிடமிருந்து கிடைத்த தகவல்கள் மற்றும் பொலிஸ் விசாரணைகளிலிருந்து தெரிய வந்துள்ளது.

அதனைப் பயன்படுத்தி அவர் பிரதேசத்தின் செல்வந்த வர்த்தகர்களிடமிருந்து கப்பம் பெறல் மற்றும் வெளிநாடுகளுக்கு ஆட்களை அனுப்புவதாகக் கூறி பண மோசடி செய்தல் சம்பவங்களில் ஈடுபட்டு வந்துள்ளார்.

ஆயினும் அவர் மீதுள்ள அச்சம் காரணமாக இதுவரை யாரும் அவருக்கெதிராக பொலிசில் முறைப்பாடு செய்ய முன்வரவில்லை என்று பொலிசார் தெரிவிக்கின்றனர். அக்கரைப்பற்று நீதிமன்றத்தில் ஆஜர் செய்யப்பட்ட அவரை விளக்கமறியலில் வைக்குமாறு நீதவான் திருமதி ராமகமலம் உத்தரவிட்டுள்ளார்.