பொலன்னறுவையில் வாக்குச் சாவடிக்குக் குண்டுத் தாக்குதல்

பொலன்னறுவையில் வாக்குச் சாவடியொன்றுக்கு இன்று காலை குண்டுத் தாக்குதல் மேற்கொள்ளப்பட்டுள்ளதாக தகவல்கள் கிடைத்துள்ளன.
பொலன்னறுவையின் அரலகங்வில பிரதேசத்தில் அமைந்துள்ள மகுல்தமண வித்தியாலயத்தில் அமைக்கப்பட்டுள்ள வாக்குச் சாவடி மீதே இன்று அதிகாலை மூன்று மணியளவில் குண்டுத்தாக்குதல் மேற்கொள்ளப்பட்டுள்ளது.

சம்பவம் காரணமாக பொலிஸ் உத்தியோகத்தர் ஒருவர் காயமடைந்துள்ளதுடன், தற்போது அவர் மருத்துவசிகிச்சைகளுக்காக பொலன்னறுவை பொது மருத்துவமனைக்கு எடுத்துச் செல்லப்பட்டுள்ளதாக பொலிசார் தெரிவிக்கின்றனர்.

அவரது நிலைமை கவலைக்கிடமானதாக இல்லை என்று மருத்துவமனை வட்டாரங்கள் தெரிவிக்கின்றன.

ஆயினும் குண்டுத் தாக்குதல் காரணமாக வாக்களிப்பு நிலையத்தின் பணிகளில் தடங்கல் ஏற்படவில்லை என்றும் வழமை போன்று காலை ஏழுமணி தொடக்கம் வாக்களிப்பு ஆரம்பமானதாகவும் பொலன்னறுவை மாவட்ட தோ்தல் தெரிவத்தாட்சி அதிகாரி அறிவித்துள்ளார்.

அத்துடன் தற்போது வாக்களிப்பு நிலையத்திற்கு இராணுவத்தினரின் மேலதிக பாதுகாப்பு வழங்கப்பட்டுள்ளது.