பொலிஸ் மா அதிபரின் மனைவியின் பாதுகாவல் வாகனம் மோதி ஒருவர் பலி

பொலிஸ் மா அதிபரின் மனைவி ஆஷா பாலசூரியவின் பாதுகாவல் வாகனம் மோதுண்டதால் மோட்டார் சைக்களிலில் பயணித்த ஒருவர் ஸ்தலத்திலேயே பலியாகியுள்ளார்.
பொலிஸ் மா அதிபர் மஹிந்த பாலசூரியவின் மனைவி ஆஷா பாலசூரிய இன்று கதிர்காமம் சென்று வழிபாடுகளில் ஈடுபட்டு விட்டு கொழும்புக்குத் திரும்பிக் கொண்டிருக்கையிலேயே இன்று மாலை 4.30 மணியளவில் இவ்விபத்து இரத்தினபுரியின் பெல்மதுளை சன்னஸ்கம பிரதேசத்தில் இடம்பெற்றுள்ளது.

அவருக்குப் பாதுகாப்பாக வந்த வாகனத்தின் வேகம் கட்டுப்படுத்தப்பட முடியாத நிலையில் கடையொன்றை இடித்துக் கொண்டு உள்ளே சென்று அங்கிருந்த மூவருக்கும் காயமேற்பட்டுள்ளது. அத்துடன் மோட்டார் சைக்கிளில் பயணித்த ஒருவரில் மோதுண்டு அவர் அந்த இடத்திலேயே பலியாகியுள்ளார். இரண்டு பொலிசாரும் விபத்தில் காயமடைந்துள்ளனர்.

ஆயினும் அதிகாரத்தை மீறிய வகையில் பொலிஸ் மா அதிபரின் மனைவி பல பாதுகாப்பு வாகனங்கள் சகிதம் பயணித்த வேளையில் விபத்து இடம்பெற்றிருப்பதால் சம்பவத்தை மூடி மறைத்து திசை திருப்ப பொலிசார் முயற்சிகளை மேற்கொண்டு வருவதாக குற்றம் சாட்டப்படுகின்றது.